Urriaren 17a Pobrezia Desagerrarazteko Nazioarteko Eguna da eta iragarki berri bat estreinatu dugu EITBn, Euskadiko hirugarren sektore sozialak desberdinkerien aurka egiten duen lana aldarrikatzeko.

Pobrezia arazo estrukturala eta dimentsio anitzekoa da, horren arrazoiak diru-sarrera faltatik haratago baitoaz. Mundu osoan milioika pertsonak ez dute duintasunez bizitzeko oinarrizko baliabiderik eta euren eskubideak urratzen dizkieten hainbat kausa pairatzen dituzte, pairatzen duten pobrezia-egoera iraunaraziz: lan-prekarietatea; lan-baldintza arriskutsuak; elikagairik eza; edo etxebizitza ez-segurua, esaterako.

Pandemiaren egungo testuinguruak, ingurumen-krisiarekin batera, desberdinkeria eta pobrezia areagotzen ditu. Horregatik, Euskadiko Hirugarren Sektore Sozialeko erakundeek pobrezia desagerrarazteko eta pertsona zaurgarrienei laguntzeko egiten duten lana aldarrikatu nahi dugu.

Gainera, pobrezia-egoeran dauden pertsonak ahalduntzea ezinbestekoa da konponbideak bilatzeko. Hori dela eta, nabarmentzekoa da hirugarren sektore sozialak lan egiten duen lana, inor atzean geratuko ez den gizarte baten eraikuntzan pertsona horien partaidetza eta aldaketarako gaitasunak sustatuz.

Urriaren 17a Pobrezia Desagerrarazteko Nazioarteko Eguna dela eta, Sareen Sareak iragarki berri bat egin du EITBrentzat, aurretik azaldutako guztia aldarrikatzeko helburuarekin. Ondorengo estekan ikus dezakezu bideoa. Era berean, bat egiten dugu NBEren #PobreziarekinAmaitu (#EndPoverty) kanpaina digitalarekin, justizia sozialaren alde borrokatzearen garrantzia ikusarazteko.