Agifesek haurren, nerabeen eta gazteen buru osasunari buruzko jardunaldia egingo du datorren urriaren 25ean. ‘Haurren eta gazteen buru osasuna. Gainditu gabeko ikasgaia’ izeneko topaketa Donostiako Udaletxeko Osoko Bilkuren Aretoan egingo da 18:00etatik aurrera, gizarte- eta osasun-arloetako profesionalen parte-hartzearekin eta lehen pertsonan eskainitako testigantzekin.

Aida Díaz Basurtuko Unibertsitate Ospitaleko psikiatrak gazteei bizitzako emozioak eta zailtasunak ezagutzen eta maneiatzen laguntzeko beharra azpimarratuko du. Bestalde, Nekane Azuabarrena psikologoak Agifesen esku-hartze programa berria aurkeztuko du. ‘Zeuk Aukeratu’ egitasmoaren xedea, hain zuzen, nerabeen eta gazteen osasun mentala zaintzeko sentsibilizazio-, prebentzio- eta laguntza-zerbitzua eskaintzea da. Azkenik, Diana Subijana eta Erika Rio ama-alabak beren esperientzia pertsonala partekatuko dute.

Saioak edukiera murriztua izango du (50 pertsona inguru), baina Agifesen Youtubeko kanalaren bidez ere zuzenean emango da.