Azken erakunde horren sarrerarekin, dagoeneko 16 dira Sareen Sarean bildutako Euskadiko sareak
Pertsona Gorren Elkarteen Euskal Federazioa, Euskal Gorrak, bazkide berri gisa sartu da Sareen Sarearen azken Batzar Nagusian.
Sareen Sarearen Batzar Nagusiak Euskal Gorrak-en sarrera onartu du urriaren 21ean. Hortaz, Euskadiko Hirugarren Sektore Sozialeko sareen sareak pertsona gorren kolektiboa batu du elkartean dauden gainerako esparruetara: garapenerako lankidetza, gizarteratzea, adinekoak, desgaitasuna, familia ugariak, aisialdi sozio-hezitzailea gazteekin eta haurrekin, eta ekonomia soziala eta solidarioa, besteak beste. Azken erakunde horren sarrerarekin, dagoeneko 16 dira Sareen Sarean bildutako Euskadiko sareak.
Pertsona Gorren Elkarteen Euskal Federazioa, Euskal Gorrak, 1980an sortutako irabazi-asmorik gabeko erakundea da. Erakundeak EAEko Pertsona Gorren Elkarte guztiak ordezkatzen eta koordinatzen ditu, eta autonomia erkidegoko pertsona gorrei gutxieneko zerbitzu-maila bermatzea du helburu. Hori guztia, euren erabateko gizarteratzea eta partaidetza lortzeko, pertsona gorren elkarte-mugimendua defendatuz eta sustatuz.
Aitor Bedialauneta, Euskal Gorrak elkarteko presidentea Euskadiko pertsona gorren erakundeak ordezkatuko ditu Sareen Sarean. “40 urte bete ditugun urte honetan, zalantzarik gabe, oso une garrantzitsua da pertsona gorren kolektiboa Sareen Sarean sartzeko. Euskadiko Hirugarren Sektore Sozialeko sareen sarean egoteak aberastu egiten gaitu, eta bertan dauden gainerako esparruekin elkarlanean aritzeko aukera ematen digu “, azaldu du Bedialaunetak Euskal Gorrak elkartearen sarrera batzarrean onartu ostean.
