Gizarteratzea, berdintasuna eta lankidetzazko gobernantza sustatzeagatik

Aurten Concha Clavero Molinari emango diogu Sareen Saria, bere ibilbide luzea eta gizarteratzearekin eta laneratzearekin, genero-berdintasunarekin eta gizarte-erakundeen eta administrazio publikoen arteko lankidetzazko-gobernantzarekin duen konpromisoa aitortuz.

Sareen Sariak Euskadi solidarioago, kohesionatuago eta inklusiboago bat eraikitzen lagundu duten pertsonen ibilbidea aintzatestea du helburu. Saria maiatzaren 12an emango da Artium Museoko auditorioan, Gasteizen, Euskadiko Hirugarren Sektore Sozialaren Eguneko ospakizun ekitaldian.

Gizarteratzearen aldeko konpromisoa

1982an Bartzelonako Unibertsitate Autonomoan Filosofia eta Letretan Psikologia Sailean lizentziaduna, Concha Claverok Donostian hasi zuen bere ibilbide profesionala, konprometitutako pertsona talde batekin batera, krisi industrialak eta adikzioek sortutako gizarte-bazterkeriari erantzuteko Sartu programa bultzatuz. Programa hori Sartu Federaziora bideratu zen gero, eta Concha izan zen Erroak erakundeko lehen koordinatzailea. Erroak erreferentziazko erakundea da Gipuzkoan gizarteratzeari eta laneratzeari dagokionez. 2024an erretiroa hartu zuen arte, Sartu Taldeko presidente izan da.

80ko eta 90eko hamarkadetan, Conchak modu aktiboan parte hartu zuen gizarte-politika garrantzitsuen garapenean, hala nola Pobreziaren aurka borrokatzeko osoko planean (1988-1992) eta Gizarte Zerbitzuen Legean (1996); ideiekin, proiektu pilotuekin eta administrazio publikoekin batera gogoeta- eta eztabaida-taldeetan parte-hartze aktiboa izanez.

Lankidetzazko gobernantza eta ikuspegi feminista

2000. hamarkadan, haren inplikazioa funtsezkoa izan zen tokiko, autonomia-erkidegoko eta nazioarteko gizarteratzeko eta laneratzeko programa berritzaileak abian jartzean. Hala nola, enplegu-planak, prestakuntza-planak, laneratzeko enpresak eta Europako Gizarte Funtsak finantzatutako Europako proiektuak. Sareko lanarekin eta lankidetzazko gobernantzarekin duen konpromisoa ere nabarmena izan da, Hirugarren Sektore Sozialaren eta administrazio publikoaren arteko elkarlanerako gune eraginkorrak bultzatuz.

Concha genero-berdintasunarekin duen konpromiso sakonagatik ere nabarmentzen da, indarkeria matxisten aurkako emakumeen taldeetan eta mugimenduetan aktiboki parte hartuz. Era berean, gizarte-erakundeak kudeatzeko eta antolatzeko moduari ikuspegi feminista eman dio. Lankideek beste emakume batzuk ahalduntzeko gaitasuna nabarmendu dute, belaunaldien arteko harremanak eta hirugarren sektorearen barruan ikuspegi feminista eraldatzailea bultzatuz.

2024an erretiroa hartu zuen arren, Conchak hainbat ekimenetan aktiboki parte hartzen jarraitzen du, bere gogo bizia, eskuzabaltasuna eta gizarte bidezkoago eta solidarioago batekiko konpromiso irmoa transmititzen jarraituz.

Saria maiatzaren 12an emango da Gasteizko Artium Museoko auditorioan, Euskadiko Hirugarren Sektore Sozialaren Egunean.