2020ra arte lehenetsitako 12 neurriko Legealdi Plana ontzat hartu du
Euskadiko Elkarrizketa Zibilaren Mahaiak (EEZM) ezohiko saio bat egin zuen atzo Lehendakaritzan, Euskadiko Hirugarren Sektore Soziala Sustatzeko I. Estrategian jasotako 36 ekintzak aurkezteko. Estrategiako dokumentua Eusko Jaurlaritzak landu du hirugarren sektorearen laguntzarekin eta Euskadiko Elkarrizketa Zibilaren Mahaiaren bidez, hori baita hirugarren sektoreak euskal administrazioan parte hartzeko daukan elkarrizketa organo nagusia.
Estrategia sortu da Euskadiko Hirugarren Sektore Sozialeko Legea (EHSS) betetzeko. Ondorioz, asmo handiko dokumentua eta aldez aurreko 36 jarduketa sortu dira, eta horiek hedatzeko legealdi bat baino gehiago beharko dira. Beraz, Jaurlaritzak eta hirugarren sektoreko sareek 2018-2020 Legealdi Plana adostu dute, eta bertan lehentasunezko 12 jarduketa jaso dira epe horretan hedatzeko.
Lehenetsitako hamabi jarduketen barruan, botere publikoaren eta hirugarren sektore sozialaren arteko elkarrizketa soziala sustatu eta bultzatzeko neurriak daude. Baita bi alderdien arteko lankidetza eta kooperazioa ere esku-hartze sozialeko erantzukizun publikoko zerbitzuak emateko. Ildo beretik, kontzertu sozialeko araubidearen bultzada barne hartzen du, kontratu modalitatetik eta lankidetzan aritzeko esparru-hitzarmetatik ezberdintzen.
Halaber, hurrengoei ere heltzen die: diru-laguntzen hobekuntza, erabilera sozialerako azpiegitura publikoei buruzko plana eta EHSSko hiru mila erakunde baino gehiagok gizarteari ematen dioten balioa sustatzea.
EHSSren egunerokoa eta ekarpena hurbiltzeko, urteroko kanpaina egiten da egun esanguratsu baten inguruan, aldizkako biltzarra egiten da, eta komunikabideekin lankidetzako ekintzak eta sentsibilizazio eta prestakuntzako bestelako ekintzak gauzatzen dira.
EHSSko errealitatea aldez aurretik aztertzeko, 2020ra arteko planak hurrengoak hartzen ditu, besteak beste: sektoreko egoerari buruzko ikerketa eta ebaluazioko aldizkako zikloa abiatzea (EHSSko Liburu Zuria) eta estrategiaren hedapena ebaluatzeko urteko txostena. Nabarmentzekoa da etorkizunean Hirugarren Sektore Sozialeko Euskal Behatokia abian jartzea.
Egun garrantzitsua
Iñigo Urkullu Lehendakariaren iritziz, Hirugarren Sektore Sozialaren Sustapen Estrategia berriaren bidez, “sendotu egiten da elkarrizketa zibileko printzipioa eta erantzukizun publikoko zerbitzuak emateko eredu mistoa, kontuan hartuta, elkartasunarekin, justiziarekin, berdintasunarekin, kohesioarekin, demokraziarekin eta parte-hartzearekin batera, elkarri zor diogula”.
“Gaur egun garrantzitsua da hirugarren sektorerako, topaketarako, elkarrizketarako eta gizarte zibilaren parte-hartzerako”, esan du Iñigo Urkulluk. “Elkarrekin lanean, gizarte-partaidetza errealitate bilakatu dugu. Topaketarako eta lankidetzarako eredu horretan sinesten dugu, eta lan partekatuarekin legegintzaldiaren hasieratik hasi gara horretan. Gobernuko sail guztiek hartu dute parte, egin dute ahalegin bizia eta aurkeztu dituzte ekimenak. Gaur, hainbat urtetako lanaren emaitza emango dugu ezagutzera, eta urte horietako lanak datorren hamarkadako etorkizun estrategikorako konprometitzen gaitu. Euskadiko Hirugarren Gizarte Sektorearen Sustapen Estrategia dugu, eta 2018-2020 legegintzaldiko plana aurkezten dugu”.
Lehendakariak Euskadiko hirugarren gizarte-sektoreko sare eta erakundeen hogei bat ordezkariei azaldutakoaren arabera, “lankidetza publiko-soziala gizarte bidezkoaren eta solidarioaren berme da, gizarte berdinzalearen eta kohesionatuaren, demokratiko eta parte-hartzailearen berme, ondasun komunera bideratuta dagoen eta pertsonen aldeko apustua egiten duen gizartearen berme”.
“Gizarte-ekimeneko eta gizartean esku hartzeko erakundeak euskal gizartearen oinarrizko aktibo dira, eta zuon laguntza ezinbestekoa da gizarte bidezkoa eta solidarioa eraikitzeko, berdinzalea eta kohesionatua, demokratikoa eta parte-hartzailea, eta gizarte-beharrei modu integralean eta pertsonalizatuan eta hurbiltasunez erantzuteko. Betiere, sektoreen arteko lankidetzan oinarrituta eta pertsona, familia, kolektibo edo erkidego hartzaileen parte-hartzearekin”, azaldu zuen Lehendakariak.
Parte-hartzailea eta transbertsala
SAREEN SAREAren arabera “Jaurlaritzaren eta EHSSren arteko estrategia bateratutik abiatzen gara, bizia, operatiboa eta dinamikoa, Euskadiko sektore publikoaren eta sektore sozialaren arteko lankidetza sendotu eta sektoreak datozen urteetarako dituen erronka nagusiei erantzungo dielakoan”.
EEZM eta SAREEN SAREko presidente Pablo Gonzalezek azpimarratu du estrategia gauzatzeko prozesua “sektore publikoaren eta sozialaren arteko lankidetzaren eredua izan dela, eta zaindu eta hedatu behar da elkarrizketa zibilaren esparruan heldu beharreko materia guztietan”.
Gonzálezek nabarmendu du, era berean, Jaurlaritzaren ekintzaren zeharkakotasun berria arlo honetan, “Eusko Jaurlaritzako hainbat sail integratu ditu lehenengoz, ez bakarrik gizarte zerbitzuen eskumena duena. Batera jarduteko Jaurlaritzaren konpromisoa sendotu egin da gaur Urkullu Lehendakariaren presentziarekin” –EHSSko sarearen iritziz.
Estrategiak, halaber, orientazio batzuk ezartzen ditu euskal administrazio publiko guztietarako. Hiru aldundiek eta EUDELek gauzatzeko prozesuaren faseetan parte hartu dute.
Bukatzeko, SAREEN SAREAk eskerrak ematen dizkie EHSSko sare eta erakundeetako, Eusko Jaurlaritzako eta prozesuan aritu diren gainerako erakundeetako ordezkariei egindako lanagatik.
Lotura EUSKADIKO HIRUGARREN SEKTORE SOZIALA SUSTATZEKO ESTRATEGIAra
