Lehendakaritzaren eskutik eta Euskalitekin lankidetzan, Sareen Sareak proiektu bat jarriko du abian, “2030 Agenda garatzeko gida” Euskadiko Hirugarren Sektore Sozialeko erakundeei hurbiltzeko. 2024an zehar, hainbat ikaskuntza-saio egingo ditugu, Garapen Jasangarriko Helburuak (GJH) barne-kudeaketan eta adierazle partekatuen erabileran txertatzeko bidean aurrera egiteko. Datorren abenduaren 18an online lehen saio bat egingo da proiektua EHSSko entitateei aurkezteko.

Proiektuaren aurrekariak

2023an, Guneak esparruaren barruan, eta Lehendakaritzako Trantsizio Sozialeko eta 2030 Agendako Idazkaritza Nagusiaren arteko lankidetzan, GJHen aldeko Euskal Aliantza sortu da. Aliantza horrek “2030 Agenda Euskadi Kontratu Sozial baterako Adierazpena” aurkeztu berri du, eta Sareen Sareak bat egin du horrekin, bai eta ikasteko saio horietan landuko den Gida ere. GJHen aldeko Euskal Aliantzaren helburua euskal erakundeen eta gizarte-eragileen arteko lankidetza-esparruak indartzea da, ardatz komun batekin: 2030 Agenda garatzeko ahaleginak bateratzea, gizarte-eragileen ahaleginak eta baliabideak koordinatuz, GJHek hartzen dituzten gai-arloetan eragin positiboa eta iraunkorra lortzeko.

Bestalde, “2030 Agenda Euskadi Kontratu Sozial baterako” adierazpenak bost konpromiso ezartzen ditu, inplikazio praktikoekin, eta horietatik bi bereziki garrantzitsuak dira proiektu honetarako:

• GJHak ezartzea enpresen eta erakundeen kudeaketan eta barne-funtzionamenduan.
• GJHetan euskal esperientziaren eredu bat bultzatzea eta nazioartean trukea erraztea.

Ikaskuntza-saioak

Testuinguru horretan, Sareen Sareak, Euskaliten laguntzarekin, Lehendakaritzak finantzatutako proiektu hau jarri du abian, “Agenda 2030 garatzeko gida” Euskadiko Hirugarren Sektore Sozialeko erakundeen errealitatera hurbiltzeko. Hainbat gizarte-erakunderekin egingo ditugun saioen bidez, ibilbide-orri bat zirriborratu nahi dugu, EHSSren posizionamendua eta espezifikotasuna bilduko dituena, GJHak bultzatzeko aurrerapen-maila desberdinetan oinarrituta.

Azken batean, proiektuaren helburua da saio horietan parte hartzen duen taldearen lana Lehendakaritzak bultzatutako Euskadi 2030 Agenda eta GIHei buruzko Eusko Jaurlaritzaren Estrategiarekin eta Euskaliten parte-hartzearekin lotzea; horrela, EHSSko erakundeen jarduera erraztuko da ODS-Gestio Aurreratua Esparruaren erabileran. Ikaskuntza-saio horietan, honako lan-ildo hauen inguruan sakonduko da:

• GJHen egoera Euskadiko Hirugarren Sektore Sozialean.
• EHSSren lana Lehendakaritzaren GJH Estrategiarekin bateratzea.
• EHSSko erakundeen GJHei buruzko ekintza-planetan sakontzeko dinamikak.