Gizarte-zerbitzuen Kudeaketako eta Berrikuntzako graduondoaren lehen edizioa amaitu eta 2019-2020 ikasturterako bigarren edizioa aurkezteari lotuta, aurkezpen-jardunaldi tekniko bat egin dute Arabako campusean, aurreko astean Bilbon eta Donostian eginiko aurkezpenen ondoren.

SAREEN SAREA, lehen edizio honetan, irakaskuntza-lanean aritu da Hirugarren Sektore Sozialaren eta Gizarte Zerbitzuen Euskal Sistemaren arteko harreman-esparruaren arloan eta azalpenak ematen ere aritu da sektorean berrikuntzaren kudeaketari, kudeaketa estrategikori eta administrazio publikoekin lotutako kudeaketari dagokionez izandako esperientzien inguruan.

Orain arte izandako arrakastari esker, lankidetza hedatu eta formalizatu egin da bigarren ediziorako.

Sareen Sarearen iritziz, funtsezkoa da unibertsitateekin eta ikerketa-zentroekin elkarlanean aritzea; izan ere, hirugarren sektore sozialeko erakundeen eta sareen funtsezko funtzioak dira ikerketa, errealitatearen azterketa eta behar zahar zein berrientzako erantzunak sustatzea. Hori dio Euskadiko Hirugarren Sektore Soziala Sustatzeko Estrategiak ere; esplizituki dio gainera.

Esku-hartze soziala Euskadiko Hirugarren Sektore Sozialeko erakundeen bereizgarria da eta hala dago jasota 2016ko Euskadiko Hirugarren Sektore Sozialeko Legean ere. Hala, sektore honek ezinbestekoa du gaitasun handiko profesionalak izatea: esku-hartze sozialean dituzten gaitasunak, trebeziak eta ezagutzak uztartu eta baliabideak kudeatzeko eta behar berriak hautemateko eta horiei erantzuteko gaitasuna duten profesionalak behar ditu sektoreak.

Baina horretarako, profesional horien profilak osatuko dituen prestakuntza eskaini behar da eta gradu hau aukera bikaina da arlo honetan ezagutza berriak eskuratu eta prestakuntza jasotzeko.

Lan Harreman eta Gizarte Langintza Fakultatea da graduondoaren antolatzailea eta Eusko Jaurlaritzako Enpleguko eta Gizarte Politiketako Sailaren finantziazioa jaso du, baita SIIS eta SAREEN SAREAren lankidetza ere.

Graduondoari buruzko informazio gehiago: https://www.ehu.eus/es/web/titulospropios/especializacion-universitaria-gestion-innovacion-servicios-sociales